Шоми имрўз дар истироҳатгоҳи «Файзи истиқлол»-и Иттифоқи касабаи кормандони маориф ва илми Ҷумҳурии Тоҷикистон басти дуюми истироҳати кўдакон ва наврасон дар мавсими тобистони соли 2025 ифтитоҳ гардид.
Дар басти дуюм истироҳатгоҳ кўдакон ва наврасон аз муассисаҳои таълимии вилояти Хатлон, шаҳри Душанбе, шаҳру ноҳияҳои тобеи ҷумҳурӣ ба истироҳати тобистона фарогир гардидаанд.
Зимни ифтитоҳи басти дуюми истироҳатгоҳ зикр гардид, ки иқдомҳои пайвастаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба таъмини ҳаёти осоиштаи кӯдакон ва риояи ҳуқуқу озодиҳои онҳо, дар руҳияи меҳру муҳаббат ба Ватан ва ҳамчун насли солиму созанда тарбия намудани кӯдакон равона гардидааст.
Дар натиҷаи ин саъю талошҳо ҳаёти кўдакони кишвар сол аз сол беҳтару рангинтар гардида, ҳамасола аз ҷониби Ҳукумати Ҷумҳурии Тоҷикистон дар бораи ташкили истироҳати кўдакон ва наврасон қарори дахлдор ба тавсиб мерасад.
Истироҳатгоҳи «Файзи истиқлол» дар минтақаи сайёҳии Варзоб дар муҳити табиии сабзу хуррам ҷойгир шуд, на танҳо фазои орому осуда барои истироҳат, балки шароити мусоид барои машғулиятҳои фароғатию варзишӣ низ фароҳам гардидааст. Кўдакон ва наврасон дар ин ҷо метавонанд ба бозиҳои варзишӣ машғул шаванд, дар маҳфилҳои эҷодӣ иштирок кунанд ва саёҳатҳои омӯзиширо дар мавсими истироҳати тобистона таҷриба намоянд.
Дар анҷоми чорабинӣ кўдакону наврасон барномаи фарҳангиро пешкаши ҳамсолон, падару модарон ва меҳмонони истироҳатгоҳ гардониданд.
